ಹುಡುಕಾಟ

ನಿನ್ನ ಕಾಣಲು ಕಣ್ಣುಗಳು ಪರಿತಪಿಸಿವೆ ಗೆಳೆಯ,
ಕಿವಿಗಳು ನಿನ್ನ ಮಾತ ಕೇಳಲೂ...
ನಿನ್ನರವು ಹುಡುಕುತಿದೆ ನನ್ನಾತ್ಮ,
ನನ್ನುಸಿರಿನ ಪ್ರತಿ ಇಂಚಿಂಚಲೂ...

-ಮೆಹನಾzzz

ಕನಸು

ಅದೆಲ್ಲೋ  ಕಳೆದು ಹೋಯಿತು, ಆ ಸುಂದರ ಕನಸು
ನೆನೆವೆಯೆಂದರೂ ನೆನಪಾಗಲೊಲ್ಲದು.
ಕೆಲ ಕನಸುಗಳೇ ಹಾಗೆ, ಅವು ಕೇವಲ ಕನಸುಗಳು
ಏನೆಂದರೂ ನನಸಾಗಲೊಲ್ಲವು.

ಮೆಹನಾzzz 

ಕಣ್ಣು

ನನ್ನ ಜೀವವೇ ಬಂದು ನನ್ನ ಕಣ್ಣಲ್ಲಿ ಕಣ್ಣ ಬೆರೆತರೂ,
ಹೇಳಲಾರದೆ ಹೋದೆ ನನ್ನ ಪ್ರೀತಿಯಾ...
ಹೇಳದಿದ್ದರೂ ಕಾಣದೆ ಹೋಯಿತೆ ನನ್ನ ಕಣ್ಣಲ್ಲಿ,
ಅದೆಷ್ಟೋ ವರ್ಷ ಬಚ್ಚಿಟ್ಟ ಪ್ರೇಮ, ಇನಿಯಾ???

ಮೆಹನಾzzz

ಸೌಂದರ್ಯ

ಕುರೂಪಿಯಾದರೂ 

ಅವನಿಗವಳೆ 

ರಂಭೆ - ಊರ್ವಶಿ. 

ಯಾಕೆಂದರೆ 

ಅವಳಪ್ಪನ ಬಳಿಯಿದೆ 

ದುಡ್ಡು ರಾಶಿರಾಶಿ!!

-ಮೆಹನಾzzz 

ಬರಹ

ನಾ ಬರೆಯುವೆ...

ಬೆರಳು ನೋಯುತಿದ್ದರೂ,

ಈ ಪೆನ್ನಿನ ಜೀವ ಮುಗಿದರೂ,

ಹಗಲು ಮುಗಿದು ಇರುಳಾದರೂ,

ನಾ ಬರೆಯುವೆ... 

ನಿನ್ನಿರವು ಕಾಣದಾದರೂ,

ಕನಸೆಲ್ಲ ಬತ್ತಿ ಹೋದರೂ,

ನನ್ನುಸಿರೇ ನಿಂತು ಬಿಟ್ಟರೂ,

ನಾ ಬರೆಯುವೆ... 

ನೀ ಬರುವ ಆಕಾಂಕ್ಷೆಯೊಂದಿಗೆ,

ನಿನ್ನ ಸೇರುವ ಹಂಬಲದೊಂದಿಗೆ,

ನನ್ನ ಪ್ರತಿ ಬರಹವೂ ಕಾಣಿಕೆ ನಿನಗೆ. 

-ಮೆಹನಾzzz 

ಮುಂಜಾನೆ

ನಸು ಮುಂಜಾನೆಯ ಬಾನಲ್ಲಿ ಚಿತ್ತಾರ ಮೂಡಿದೆ

ಒಂದು ಹೊಸ ಬೆಳಗನ್ನು ಸ್ವಾಗತಿಸಲು.
ಅದು ತಾನೇ ಮದುಮಗಳಂತೆ ಕಂಗೊಳಿಸಿದೆ
ಕಲಾವಿದನ ಕುಂಚಗಳಿಗೆ ಬಣ್ಣವ ತುಂಬಿಸಲು.

-ಮೆಹನಾzzz 

ನೋವು

ಯಾಕೋ ಏನೋ ಅದೇನೋ ನೋವು ಹೃದಯ ತುಂಬೆಲ್ಲ
ನೀನೆಂದೆಂದು  ನನ್ನವನಾದರೂ ನನ್ನ ಬಳಿಯಿಲ್ಲ
ನಿನ್ನ ಕಾಣದ ನಿಮಿಷಗಳು ವರುಷಗಳಂತೆ ಕಾಡಿವೆ
ನೀ ಬರುವ ಹಾದಿಯ ಕಾದು ನಾ ಸೋತುಹೋಗಿರುವೆ

-ಮೆಹನಾzzz 

ಕಳ್ಳ

ಅವ ಅನ್ನುತ್ತಿದ್ದ ಅವಳ ಕಂಡೊಡನೆ,
ನೀನೇ ನನ್ನ ಬಂಗಾರಿ, ನನ್ನ ಚಿನ್ನಾರಿ..
ಈಗ ಅವಳ ಧನ-ಕನಕ ಸಿಕ್ಕೊಡನೆ,
ದೋಚಿ ಆಗಿರುವನು ಪರಾರಿ.

-ಮೆಹನಾzzz 

ಪತಿಯ ಪಿಸುದನಿ

ನನ್ನೊಡತಿ ಚೆಲುವೆ ಚಾರು..
ನಿನಗೇಕೆ ಒಡವೆ ಕಾರು?
ನಾ ನಿನಗೊಡವೆ ನೀ ನನಗೊಡವೆ
ನಮಗಿಬ್ಬರಿಗೂ ಬೇಡ ಒಡವೆ ಕಾರುಗಳ ಗೊಡವೆ.

-ಮೆಹನಾzzz 

ನಿನ್ನ ನೆನಪು

ಮೊದಲ ಮಳೆಯ ಹನಿಯ ತಂಪು..
ಮಾಮರದ ಕೋಗಿಲೆಯ ದನಿಯ ಇಂಪು..
ಮಳೆ ಹನಿಗೆ  ಬಿರಿದ ಮಲ್ಲಿಗೆಯ ಕಂಪು..
ತಂದಿತು ನನಗೆ ನಿನ್ನದೇ ನೆನಪು.

-ಮೆಹನಾzzz 

ಕಾಯುತಿರುವೆ ನಿನಗಾಗಿ

ನಿನ್ನ ಕಂಗಳಲ್ಲೇನೋ ಮೋಡಿಯಿದೆ.
ಎಷ್ಟು ನೋಡಿದರೂ ತೀರದ ದಾಹವಿದೆ.
ನಿನಗಾಗಿ ನಾ ಜನುಮಗಳೇ ಕಾದೆ.
ನಿನ್ನ ಕಾಣದೆ ನಾ ಬಳಲಿದೆ.. ಸೋತುಹೋದೆ..

-ಮೆಹನಾzzz 

ಆಸೆ

ನಿನ್ನ ಹೃದಯದ ಮೂಲೆಯಲ್ಲಿ ಬಚ್ಚಿಟ್ಟುಕೊಂಡು
ಹೊಸ ಕವನ ಬರೆಯುವಾಸೆ ನನಗೆ..
ನನ್ನ ಬಾಹುಗಳಲ್ಲಿ ನಿನ್ನ ಮುಚ್ಚಿಟ್ಟುಕೊಂಡು
ಹೊಸ ಕನಸ ಹೆಣೆಯುವಾಸೆ ನನಗೆ..

-ಮೆಹನಾzzz 

ಹೊಸ ಜನ್ಮ

ನನ್ನ ಕಣ್ಣಲ್ಲಿ ಕಣ್ಣಿಟ್ಟು ನೋಡು ಗೆಳೆಯಾ..
ಕಾಣಿಸಬಹುದೇನೋ ನಾ ತೀರ ಹೊಸದಾಗಿ..

ಉಳಿದಿಲ್ಲ ನಾನಿನ್ನೂ ನಿನ್ನ ಗೆಳತಿಯಾಗಿ,
ಬದಲಾಗಿರುವೆ ಈಗ ನಿನ್ನ ಪ್ರೇಮಿಯಾಗಿ..

-ಮೆಹನಾzzz 

ಏಕಾಂಗಿ

ವಿರಹದ ತಾಪ ತನುಮನ ಸುಡುತಿರಲು..

ಹೇಗಿರಲಿ ಗೆಳೆಯ ನಾ ನಿಶ್ಚಿಂತಳಾಗಿ?

ಪುನಹ ಜೊತೆಯಾಗುವ ಹಂಬಲ ಜೊತೆಗಿರಲು..

ಕಾಯುತಿರುವೆ ನಾ ಏಕಾಂಗಿಯಾಗಿ..

-ಮೆಹನಾzzz 

ಕಣ್ಣ ಬಿಂಬ

ಓ ಗೆಳೆಯನೇ ನಿನ್ನ
ನಾ ನೋಡಿದಾಗಿನಿಂದ..
ನಿನ್ನದೇ ಬಿಂಬ
ನನ್ನ ಕಣ್ಣ ತುಂಬ..

-ಮೆಹನಾzzz 

ಮರಳಿ ಬಾ

ನಿನ್ನ ಪ್ರತಿ ಮಾತು ನನಗಾಪ್ತ,
ನಿನ್ನ ಹೃದಯ ನನ್ನ ಸ್ವಂತ,
ನೀನಿಲ್ಲದೆ ನನಗುಳಿವಿಲ್ಲ,
ಮರಳಿ ಬಾ ಓ ಗೆಳೆಯ..

-ಮೆಹನಾzzz 

ನೀನು

ನೀನಿರಲು ಬಳಿ ನನ್ನ ಜೀವನ ಪಾವನ..
ನೀನಿಲ್ಲದಿರೆ ಸಂಕಟ ಪ್ರತಿಕ್ಷಣ ಪ್ರತಿದಿನ...
ನಿನ್ನ ಸ್ಪರ್ಶವೇ ನನ್ನ ನೋವುಗಳಿಗೆಲ್ಲಾ ಶಮನ..
ನಿನ್ನ ಕೊಟ್ಟ ದೇವರಿಗೆ ನನ್ನ ಕೋಟಿ ನಮನ..

-ಮೆಹನಾzzz 

ಹೊಸ ಕವನ..

ಆದಂದಿನಿಂದ ನಮ್ಮಿಬ್ಬರ
ಆತ್ಮಗಳ ಮೊದಲ ಮಿಲನ..
ಬರೆಯಲಾರಂಭಿಸಿದೆ ಈ ಹೃದಯ
ದಿನವೂ ಹೊಸತೊಂದು ಕವನ..

-ಮೆಹನಾzzz 

ಜೇನು

ನಿನ್ನ ಮಾತುಗಳೆಂದರೆ ನನಗೆ
ಬೆಲ್ಲಕ್ಕೆ ಅಂಟಿದ ಜೇನು..
ನಿನ್ನ ಮೌನ ಸಹಿಸಲಾರೆ,
ತಿಳಿದಿಲ್ಲವೇ ನಿನಗಿನ್ನೂ?

-ಮೆಹನಾzzz